Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 22.35 | Dem. 22.38 (English) | >>Dem. 22.41 |
22.37οὐ μὴν ἀλλʼ εἰ καὶ τὰ μάλιστα πάσης ἔσθʼ ἁγὼν τῆς βουλῆς , ὅσῳ συμφέρει μᾶλλον ὑμῖν καταγνοῦσιν ἢ μὴ θεάσασθε . εἰ μὲν ἀπογνώσεσθε , ἐπὶ τοῖς λέγουσι τὸ βουλευτήριον ἔσται , ἐὰν δὲ καταγνῶτε , ἐπὶ τοῖς ἰδιώταις · ἑορακότες γὰρ οἱ πολλοὶ διὰ τὴν τῶν λεγόντων πονηρίαν τήνδʼ ἀφῃρημένην τὴν βουλὴν τὸν στέφανον , οὐχὶ προήσονται τούτοις τὰς πράξεις , ἀλλὰ τὰ βέλτιστʼ ἐροῦσιν αὐτοί . εἰ δὲ γενήσεται τοῦτο καὶ τῶν ἠθάδων καὶ συνεστηκότων ῥητόρων ἀπαλλαγήσεσθε , ὄψεσθʼ , ὦ ἄνδρες Ἀθηναῖοι , πάνθʼ ἃ προσήκει γιγνόμενα . ὥστʼ εἰ μηδενὸς ἄλλου ἕνεκα , διὰ ταῦτα καταψηφιστέον .
ὃ τοίνυν ἕτερον δεῖ μὴ λαθεῖν ὑμᾶς , ἀκούσατε . ἴσως ἀναβήσεται καὶ συνερεῖ τῇ βουλῇ Φίλιππος καὶ Ἀντιγένης καὶ ὁ ἀντιγραφεὺς καί τινες ἄλλοι , οἵπερ ἐκεῖ διʼ ἑαυτῶν εἶχον μετὰ τούτου τὸ βουλευτήριον καὶ τούτων τῶν κακῶν εἰσιν αἴτιοι . δεῖ δὴ πάντας ὑμᾶς γιγνώσκειν ὅτι τούτοις ἐστὶ μὲν ἡ πρόφασις τῆς συνηγορίας τῇ βουλῇ βοηθεῖν , τῇ δʼ ἀληθείᾳ περὶ αὑτῶν ἀγωνιοῦνται καὶ τῶν εὐθυνῶν ἃς αὐτοὺς προσήκει δοῦναι τῶν πεπραγμένων .
22.39ἔχει γὰρ οὕτως . ἂν μὲν ἀπογνῶτε τὴν γραφὴν ταύτην , ἅπαντές εἰσιν ἀπηλλαγμένοι καὶ δίκην οὐδεὶς οὐδεμίαν μὴ δῷ · τίς γὰρ ἔτʼ ἂν καταψηφίσαιτʼ ἐκείνων , τὴν βουλὴν ὑμῶν ἐστεφανωκότων ἧς οὗτοι προέστασαν ; ἐὰν δὲ καταγνῶτε , πρῶτον μὲν τὰ εὔορκʼ ἔσεσθʼ ἐψηφισμένοι , εἶτʼ ἐπὶ ταῖς εὐθύναις ἕκαστον τούτων λαμβάνοντες , ὃς μὲν ἂν ὑμῖν ἀδικεῖν δοκῇ , κολάσετε , ὃς δʼ ἂν μή , τότʼ ἀφήσετε . μὴ οὖν ὡς ὑπὲρ τῆς βουλῆς λεγόντων καὶ τῶν πολλῶν ἀκούετε , ἀλλʼ ὡς ὑπὲρ αὑτῶν παρακρουομένοις ὀργίζεσθε .
22.38
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 22.35 | Dem. 22.38 (English) | >>Dem. 22.41 |